Psa 5 | PMA | STEP | O Iahova, kisan ralingom en selusien onak, ka kitaengon mahien onak.

Psalms 5

Ahi Asuv Kur Koe Koakeil Ualien One Tahos

1 O Iahova, kisan ralingom en selusien onak,
ka kitaengon mahien onak.
2 Ahi ka Asuv Houlu onak,
kilong tangien onak ven kovakataun inau.
Namul nasan hisien keil onak minuk;
3 en visokon, kolongen rek.
Navong meteiai kistal, namul napeahik,
ka nakilea keke kisan heite minau.

4 Keik korvitei Ahi koa kovasik ven sakien keil tatisa,
kormaentei meatin tatisa keil avamai venuk.
5 Tovuti keil asakras avalomal en metom.
Kolele tisa en koakeil koa ualien one romaltei.
6 Ku rasil lin koakeil amul amumon liluvosien.
Ahi Asuv, tinom katiat varei ven koakeil ten rea ka vati luvosien keil.

7 Ka ven more envatien onom,
nakilea maha en teim som.
En Eim Votut onom, navati lat isom,
naretengeiril minuk ven koa navouhou enuk.
8 Ahi Asuv, meatin houlu mete tisa enau.
Kilamu enau en sise ten maluen,
kitie sise koa emvati mausili.

9 Koakeil mete tisa enau,
tine vil en rendemien tou rasil lin tounah ien;
nasakras maling desien onak val en selusien one.
Selusien one suval ahoung,
koa leh rendemien onen meatin ka mu vini.
10 Ahi ten out nesa, hesan mahien min keil.
Tounah tatisa koa avit avoumoni min meatin sav,
hehiles hemai ris en keil.
Kisila keil iha ranuk ven tisaen keil
koa amumoni va katuk,
ka ven amul amumon rea ral minuk.

11 Ka koakeil aro suai enuk en avong takeih, isi keil;
ka lises, isau masmasuk.
Kisak ven koakeil evatuk
keke meatin tatisa keil anapuruntei keil,
hesakini ihat lat isom.
12 Ahi Asuv, tokolkatien onom hel en koakeil ualien one tahos;
koring koe keil ral envatien onom suval ousiel koa asuv lingi mul koe rea.